فیصل آباد (اُردو پوائنٹ اخبارتازہ ترین - اے پی پی۔ 29 ستمبر2024ء) لیک سٹی پینتھرز نے پہلا بحریہ ٹاؤن چیمپئنز ون ڈے کپ اپنے نام کرلیا،فائنل میں یوایم ٹی مارخورز کو 5 وکٹوں سے شکست دی،محمد حسنین اور عرفات منہاس کی تین تین وکٹیں،محمد حسنین ٹورنامنٹ میں 17 وکٹوں کےساتھ سرفہرست رہے عثمان خان نے ٹورنامنٹ میں سب سے زیادہ 272 رنز بنائے، ساجد خان پلیئر آف دی میچ اور محمد حسنین پلیئر آف دی ٹورنامنٹ قرار دئیے گئے۔ عثمان خان (272 رنز ) ٹورنامنٹ کے بہترین بیٹر رہے، محمد حسنین ( 17 وکٹ ) بہترین بولر اور عثمان خان ( سات کیچز ایک اسٹمپڈ ) بہترین وکٹ کیپر قرار پائے۔ نوجوان فاسٹ بولر علی رضا ٹورنامنٹ کے بہترین ایمرجنگ کرکٹر قرار پائے۔ اتوار کو اقبال اسٹیڈیم میں ُپرجوش شائقین کے سامنے مارخورز کے کپتان افتخار احمد نے ٹاس جیت کر پہلے بیٹنگ کا فیصلہ کیا لیکن پینتھرز کے بولرز نے اسے 33.4 اوورز میں صرف 122 رنز پر آل آؤٹ کردیا۔

(جاری ہے)

پینتھرز کو ہدف تک پہنچنے کے لیے پانچ وکٹوں کا نقصان اٹھانا پڑا اور اس نے مطلوبہ اسکور 18 اوورز میں پورا کرلیا۔مارخورز کی وکٹیں گرنے کا سلسلہ تیسرے اوور سے ہی شروع ہوگیا تھا جس کے بعد وہ کسی بھی موقع پر بڑا اسکور کرنے کی پوزیشن میں نہ آسکی۔ مارخورز کی اننگز میں فخرزمان پانچ چوکوں اور ایک چھکے کی مدد سے 46 رنز بناکر نمایاں رہے۔ حسیب اللہ نے تین چوکوں کی مدد سے27 رنز بنائے۔ فخر اور حسیب کے درمیان تیسری وکٹ کی شراکت میں 56 رنز بنے۔ کپتان افتخار احمد 3،ٹورنامنٹ میں دو سنچریاں بنانے والے کامران غلام 2 ، زین عباس 6 اور عبدالصمد بغیر کوئی رن بنائے آؤٹ ہوگئے۔مارخورز کی آخری 8 وکٹیں اسکور میں صرف 40 رنز کا اضافہ کرسکیں۔محمد حسنین نے38 رنز دے کر 3 وکٹیں حاصل کیں۔ لیفٹ آرم اسپنر عرفات منہاس نے 2.4 اوورز کی بولنگ میں صرف ایک رن دے کر 3 وکٹیں حاصل کرڈالیں۔فائنل کے لیے پینتھرز کی ٹیم میں شامل کیے جانے والے آف اسپنر ساجد خان نے 24 رنز کے عوض 2 وکٹیں حاصل کیں۔ اوپنرز عبدالواحد بنگلزئی اور عمر صدیق نے پینتھرز کو 51رنز کا اسٹارٹ دیا۔ عمرصدیق 19 رنز بناکر آؤٹ ہوئے۔ ون ڈاؤن پر بیٹنگ کے لیے آنے والے ساجد خان 15 اور عثمان خان 13 رنز بنا پائے۔ عبدالواحد بنگلزئی 2 چھکوں اور 5 چوکوں کی مدد سے41 رنز اسکور کرکے عمران جونیئر کی گیند پر آؤٹ ہوئے جنہوں نے اسی اوور میں حیدر علی کو بھی صفر پر آؤٹ کردیا۔پینتھرز کی پانچویں وکٹ 94 کے اسکور پر گری تو اسے جیت کے لیے 29 رنز درکار تھے ۔ اس موقع پر رضوان محمود اور کپتان شاداب خان نے اپنی ٹیم کو جیت سے ہمکنار کردیا۔ رضوان 3 چوکوں کی مدد سے 16 رنز بناکر ناٹ آؤٹ رہے۔ شاداب نے شاہنواز دھانی کی گیند پر چھکے کے ساتھ جیت کو تکمیل پر پہنچادیا۔ وہ ایک چوکے اور ایک چھکے کی مدد سے 14 رنز کے ساتھ ناٹ آؤٹ رہے۔ میچ کے اختتام پر پروقار تقریب کا انعقاد کیا گیا۔ وفاقی وزیر داخلہ اور چیئرمین پی سی بی محسن نقوی مہمان خصوصی تھے۔ تقریب میں ونر ٹیم کو ٹرافی اور انعامی رقم دی گئی جبکہ رنر آپ کو انعامی رقم کا چیک دیا گیا۔ بہترین انفرادی کارکردگی کا مظاہرہ کرنے والے کھلاڑیوں میں انعامات اور انعامی رقم تقسیم کی گئی۔ ونر ٹیم کے سپانسر نے ٹیم کیلئے ایک کروڑ روپے کے خصوصی انعام کا اعلان کیا جبکہ حسنین کو گاڑی کا انعام دیا گیا۔