کوئٹہ (اُردو پوائنٹ اخبارتازہ ترین - اے پی پی۔ 14 اکتوبر2024ء) ڈپٹی کمشنر گوادر حمود الرحمٰن سے سوشل ویلفیئر آفیسر عبیداللہ بلوچ کی قیادت میں خواجہ سراؤں کے وفد نے ملاقات کی۔ وفد کی سربراہی خواجہ سرا صنم بلوچ نے کی، جنہوں نے اپنی کمیونٹی کو درپیش مختلف مسائل اور مشکلات پر تفصیل سے روشنی ڈالی۔ڈپٹی کمشنر کے دفتر سے جاری کردہ ایک بیان کے مطابق ملاقات کے دوران خواجہ سراؤں نے روزگار کے مواقع، طبی سہولیات اور سیلاب کے دوران ان کے گھروں کی تباہی کے مسائل پر بات کی۔

(جاری ہے)

مزید برآں انہوں نے پولیس سے تحفظ کی درخواست کی کیونکہ عوامی جگہوں اور بازاروں میں انہیں ہراساں کیا جاتا ہے۔ انہوں نے راشن اور دیگر بنیادی ضروریات میں درپیش مشکلات کا بھی ذکر کیا اور ان مسائل کے فوری حل کا مطالبہ کیا تاکہ ان کی زندگیوں میں بہتری لائی جا سکے۔ڈپٹی کمشنر حمود الرحمٰن نے ان کی شکایات کو غور سے سنا اور اس موقع پر کہا کہ بطور پاکستانی شہری خواجہ سراؤں کو ملک کے دیگر شہریوں کی طرح تمام بنیادی حقوق حاصل ہیں۔ انہوں نے اس بات کا اعادہ کیا کہ ضلعی انتظامیہ خواجہ سراؤں کے حقوق کے تحفظ اور ان کے مسائل کے حل کے لیے ہر ممکن اقدامات کرے گی۔