ماسکو (ڈیلی پاکستان آن لائن) روس نے کہا ہے کہ امریکی صدر کی جانب سے یوکرین کو طویل فاصلے تک مار کرنے والے میزائل کے استعمال کی اجازت دینا براہ راست جنگ میں شریک ہونے کے مترادف ہے۔
غیر ملکی میڈیا کے مطابق روسی ایوان صدر کے جانب سے جاری ہونیوالے بیان میں کہا گیا ہے کہ امریکہ میزائل پالیسی میں تبدیلی صرف جنگ کو بڑھاوا دینے کے لیے کر رہا ہے، یوکرین کو روسی علاقوں پر حملے کے لیے امریکی ساختہ ہتھیاروں کے استعمال کی اجازت دینے کے فیصلے سے کشیدگی میں اضافہ ہو گا۔ کریملن کے ترجمان دمتری پیسکوف نے بیان میں مزید کہا کہ جوبائیڈن کے اس اقدام سے روس یوکرین تنازع میں امریکہ کی براہ راست شمولیت مزید گہری ہو جائے گی۔دمتری پیسکوف نے کہا کہ ایک ماہ بعد سبکدوش ہونے والے صدر جو بائیڈن یوکرین میں تنازع کو بڑھانا چاہتے ہیں۔
