دانیا انور نے نجی ٹی کے شو میں دیگر اداکاروں کے ساتھ اپنی ذاتی زندگی پر کھل کر بات کی اور ان کی جانب سے کی گئی بات کی مختصر ویڈیو سوشل میڈیا پر وائرل ہوگئی۔

سوشل میڈیا پر وائرل مختصر ویڈیو میں دانیا انور نے بتایا کہ ان کی پہلی شادی 6 سال تک چلی اور انہوں نے شادی کو کامیاب کرنے کی بھرپور کوشش کی۔

انہوں نے بتایا کہ وہ نہیں چاہتیں تھیں کہ ان کی شادی ختم ہو، اس لیے وہ تشدد اور تضحیک بھی برداشت کرتی رہیں لیکن اس باوجود ان کی شادی طلاق پر ختم ہوئی۔

دانیا انور کا کہنا تھا کہ انہوں نے شوہر سے خلع لی تھی اور جب انہوں نے خلع کے لیے عدالت سے رجوع کیا تھا، تب ہی لوگوں کے رویے تبدیل ہوگئے۔

ان کے مطابق طلاق کے بعد انہیں خراب سمجھا گیا، انہیں برا بھلا کہا گیا، یہاں تک کہ ان کے کردار پر انگلیاں اٹھائیں گئیں، انہیں بدکردار سمجھا گیا۔

دانیا انور کا کہنا تھا کہ انہیں اس وقت حیرت ہوئی جب انہیں اپنی بچپن کی سہیلیوں اور اسکول کی ساتھیوں نے بھی غلط کہنا شروع کیا۔

ان کے مطابق طلاق ہوجانے کے بعد ان کی سہیلیاں یہ بھی کہتی رہیں کہ انہیں شوہر اچھے نہیں لگتے تھے، ان کی دوسروں سے تعلقات تھے، اس وجہ سے انہوں نے شادی ختم کی۔

دانیا انور نے کہا کہ طلاق کے بعد جب وہ واپس اپنے دوستوں اور قریبی افراد کے ساتھ وقت گزارنے گئیں تو انہیں احساس ہوا کہ لوگ انہیں کس طرح غلط سمجھ رہے ہیں۔

خیال رہے کہ اس سے قبل دانیا انور متعدد انٹرویوز میں اپنی پہلی شادی اور بچوں سمیت دوسری شادی پر کھل کر بات کر چکی ہیں۔

ایک سال قبل انہوں نے ایک انٹرویو میں بتایا تھا کہ انہوں نے 19 برس کی عمر میں محبت کی تھی لیکن شوہر نے ان پر دوسرے سال سے ہی تشدد کرنا شروع کردیا تھا۔

اداکارہ نے بتایا تھا کہ جنسی، ذہنی اور جسمانی تشدد کے باوجود انہوں نے شادی کو کامیاب بنانے کی کوشش کی لیکن بالآخر ان کی شادی طلاق پر ختم ہوئی اور انہیں پہلے شادی سے دو بچے، ایک بیٹی، ایک بیٹا ہیں۔

دانیا انور نے اسی انٹرویو میں بتایا تھا کہ پہلی شادی کے ختم ہونے فوری بعد ہی مردوں نے انہیں پیش کش کرنا شروع کردی تھیں لیکن وہ ہر کسی کو اپنے بچے دکھا کر خاموش کراتی تھیں۔

اداکارہ نے بتایاکہ بعد ازاں انہیں فرحان نامی شخص بہت اچھے لگے، انہوں نے پہلے ان کے بچوں سے اچھے تعلقات بنائے اور پھر ان سے شادی کی۔

دانیا انور نے یہ بھی انکشاف کیا تھا کہ ان کے دوسرے شوہر نے ان سے قبل تین شادیاں کی تھیں اور وہ ان کی چوتھی بیوی ہیں، تاہم انہوں نے یہ واضح نہیں کیا تھا کہ ان کے شوہر کی پہلی تینوں شادیاں ناکام ہوئیں یا وہ شادیوں میں تھے؟