نئی دہلی(مانیٹرنگ ڈیسک) بھارتی اداکار سونو سود سعودی عرب میں انتقال کرجانے والے ایک بھارتی ورکر کی میت واپس لانے میں اس کی فیملی کی مدد کرکے ایثار کی نئی مثال قائم کر دی۔ ہندوستان ٹائمز کے مطابق رواں ماہ کے آغاز میں اس متوفی ورکر کے بھتیجے نے سماجی رابطے کی ویب سائٹ ایکس پر ایک پوسٹ میں سونوسود کو ٹیگ کرتے ہوئے اس حوالے سے ان سے مدد کی درخواست کی تھی۔
حیدرآباد کے رہائشی اس نوجوان نے لکھا تھا کہ ’’میرا انکل سعودی عرب میں ایک سیمنٹ پلانٹ میں کام کرتا تھا، جس کا ہارٹ اٹیک کے سبب انتقال ہو گیا ہے۔ اس کی میت واپس لانے میں ہماری مدد کیجیے پلیز۔‘‘ نوجوان کی اس پوسٹ پر سونو سودنے جواب دیا کہ ’’میں اپنی پوری کوشش کروں گا، میں نے متعلقہ حکام سے رابطہ بھی کر لیا ہے۔‘‘
رپورٹ کے مطابق سونو سود کی کوشش سے میت گزشتہ روز حیدرآباد ایئرپورٹ پر پہنچ گئی۔سونو سود کی طرف سے متوفی کی میت بھارت پہنچنے کی تصدیق اپنے ایکس اکائونٹ پر ایک پوسٹ کے ذریعے کی گئی ہے۔ اداکار نے اس پوسٹ میں متوفی کی فیملی کے ساتھ اظہار تعزیت بھی کیا ہے۔
