ممبئی (ڈیلی پاکستان آن لائن ) بالی ووڈ اداکار و پروڈیوسر اجے دیوگن نے ماضی کا یادگار قصہ سناتے ہوئے انکشاف کیا کہ ایک مرتبہ انہوں نے مادھوری ڈکشت کو دیکھتے ہوئے اپنا منہ جلا لیا تھا۔
دلکش مسکراہٹ والی بالی ووڈ حسینہ مادھوری کے مداح نہ صرف عام لوگ بلکہ ساتھی اداکار بھی ہیں جس بات کا اندازہ اجے دیوگن کے انکشاف سے لگایا جاسکتا ہے۔
2019 میں فلم ٹوٹل دھمال کی تشہیر کے لئے دیئے گئے ایک انٹرویو میں اجے نے 2001 کا ایک قصہ سنایا، فلم ’یہ راستے ہیں پیار کے‘ جس کے مرکزی کرداروں میں مادھوری اور اجے سمیت پریتی زنٹا بھی تھیں۔
اجے دیوگن نے ہنستے ہوئے بتایا کہ 2001 میں اس فلم کی شوٹنگ شروع ہونی تھی اور ہم سب ایک کمرے میں بیٹھے تھے، میں جوس اور ساتھ میں سگریٹ پی رہا تھا۔
اجے نے کہا کہ اتنے میں مادھوری ڈکشت کمرے میں داخل ہوئیں، میں نے انہیں دیکھا اور دیکھتا رہ گیا، وہ اتنی خوبصورت تھیں کہ ان کے آنے سے کمرے کا ماحول ہی بدل گیا، میں نے سگریٹ پینے کے بجائے الٹی منہ پر لگا لی جس سے چہرہ جل گیا۔
دوران گفتگو مادھوری سمیت اجے دیوگن نے سب کو اپنے چہرے پر موجود نشان بھی دکھایا۔
اجے دیوگن نے کہا کہ یہ دیکھیں مادھوری کا نشان آج بھی میرے چہرے پر ہے، میں اسے مادھوری ڈکشت کا نشان کہتا ہوں، جس پر اداکارہ سمیت دیگر فنکاروں نے بھی قہقہہ لگا دیا۔