گوہر رشید نے حال ہی میں ایک شو میں شرکت کی، جہاں انہوں نے محبت سے متعلق کھل کر بات کی۔

ایک سوال کے جواب میں اداکار نے مسکراتے ہوئے بتایا کہ انہوں نے شریک حیات تلاش کرلیا ہے اور اب ان کے بغیر زندگی گزارنا ان کے لیے مشکل بن چکا ہے۔

گوہر رشید کا کہنا تھا کہ وہ دونوں ایک دوسرے کو کافی عرصے سے جانتے ہیں جب کہ وہ انتہائی خوبصورت اور بہترین شخصیت کی مالک خاتون ہیں۔

میزبان کے پوچھنے پر گوہر رشید نے واضح طور پر کہا کہ ان کا جلد شادی کا ارادہ ہے، تاہم انہوں نے شادی سے متعلق کوئی ٹائم فریم نہیں دیا۔

گوہر رشید نے اپنی ہونے والی شریک حیات پر بات کرتے ہوئے ان کا نام لینے سے بھی گریز کیا اور نہ ہی یہ بتایا کہ ان کا تعلق شوبز انڈسٹری سے ہے یا نہیں؟ تاہم ان کی باتوں سے عندیہ ملتا ہے کہ ان کی ہونے والی شریک سفر کا تعلق شوبز انڈسٹری سے ہی ہے۔

گوہر رشید کی جانب سے محبت کا اعتراف کیے جانے اور جلد شادی کا عندیہ دیے جانے پر میزبان اداکار اشنا شاہ نے بھی ان کی ہونے والی شریک حیات کی تعریفیں کیں اور کہا کہ وہ دونوں کو جانتی ہیں، دونوں ہی اچھے انسان ہیں۔

جہاں گوہر رشید نے اپنی ہونے والی شریک حیات کا نام نہیں بتایا، وہیں میزبان نے بھی ان کی ہونے والی شریک سفر کا نام نہیں بتایا، تاہم اداکار نے کہا کہ ان کے والدین بھی چاہتے ہیں کہ وہ جلد شادی کے بندھن میں بندھ جائیں۔

ماضی میں گوہر رشید اور کبریٰ خان کے درمیان محبت کی چہ مگوئیاں ہوتی رہی ہیں اور دونوں کو متعدد بار ایک ساتھ بھی رومانوی انداز میں دیکھا جاتا رہا ہے۔

ماضی میں دونوں ایک دوسرے سے تعلقات پر مبہم انداز میں بات کرکے یہ واضح کر چکے ہیں کہ ان کے درمیان صرف دوستی ہے، ان کے درمیان کسی طرح کے کوئی رومانوی تعلقات نہیں لیکن گوہر رشید کی جانب سے حالیہ انٹرویو کے بعد ایک بار پھر ان کے درمیان رومانوی تعلقات کی چہ مگوئیاں ہونے لگی ہیں۔