اسلام آباد (اُردو پوائنٹ اخبارتازہ ترین - اے پی پی۔ 19 نومبر2024ء) ڈریم ٹیم نے فیڈرل ویمنز باسکٹ بال ٹورنامنٹ کا ٹائٹل جیت لیا۔ فاتح ٹیم نے فیصلہ کن معرکے میں وارئرز کلب کوشکست دی۔

(جاری ہے)

پاکستان سپورٹس کمپلیکس اسلام آباد میں فیڈرل باسکٹ بال ایسوسی ایشن کے زیر اہتمام رائٹ ٹو پلے اور الانس فرانسیز کے تعاون سے کھیلے جانیوالےدو روزہ ٹورنامنٹ کے فائنل کے مہمان خصوصی پاکستان میں فرانس کے سفیر نکلولس گیلی تھے جبکہ اختتامی تقریب میں فیڈرل باسکٹ بال ایسوسی ایشن کے سیکرٹری جنرل اوج ظہور، رائٹ ٹو پلے کے کنٹری ڈائریکٹر علی خیام، فرانسیسی سفیر کی اہلیہ سمیت دیگر شخصیات بھی موجود تھیں۔ ٹورنامنٹ کے فائنل میں ڈریم ٹیم نے اپنے جارحانہ کھیل کی بدولت وارئرز کلب کو 20کے مقابلے میں 30پوائنٹس سے شکست دی۔ فاتح ٹیم کی طرف سے ماریہ سورتگر نے 10، حمنا روہی نے 8پوائنٹس سکورکئے جبکہ وارئرز کلب کی طرف سے نور فاطمہ 10پوائنٹس سکور کر سکیں۔ اختتامی تقریب سے خطاب کرتے ہوئے فرانسیسی سفیر نے کہا کہ صحت مند معاشرے کو پروان چڑھانے کےلئے ایسی سرگرمیاں ضروری ہے ،فرانسیسی سفارتخانہ کھیلوں کے فروغ کےلئے ہر ممکن تعاون کرے گا۔