ملتان (اُردو پوائنٹ اخبارتازہ ترین - اے پی پی۔ 29 نومبر2024ء) چوتھے ٹی ٹوئنٹی بلائنڈ کرکٹ ورلڈکپ میں جنوبی افریقہ اور پاکستان کی بلائنڈ کرکٹ ٹیموں نے اپنے اپنے میچ جیت لئے۔جمعہ کوڈی ایچ اے گراؤنڈ میں ساؤتھ افریقہ نے افغانستان کو9 وکٹوں سے شکست دیدی۔ افغانستان نے ٹاس جیت کرپہلے بیٹنگ کرتے ہوئے 20 اوورزمیں 7 وکٹوں کے نقصان پر 171 رنز سکور کئے ۔کپتان اباسین نے 52 بالز پر 63 رنزکی اننگزکھیلی ۔داران نے 22گیندوں پر 30رنزبنائے ۔جواب میں ساؤتھ افریقہ نے ہدف 11.4 اوورزمیں ایک وکٹ کے نقصان پرحاصل کرلیا ۔لیسیدی لیصوفی نے شانداربیٹنگ کرتے ہوئے 44 بالزپر 75 رنزناٹ أؤٹ اور ماتھاپو نے 33 بالزپر 60 رنزبنائے۔ملتان کرکٹ سٹیڈیم میں کھیلے گئے دوسرے میچ میں پاکستان نے سری لنکا کو باآسانی 9 وکٹوں سے شکست دے کر ایونٹ میں اپنی مسلسل چوتھی کامیابی حاصل کر لی۔

(جاری ہے)

ملتان کرکٹ سٹیڈیم میں سری لنکا نے ٹاس جیت کرپہلے بیٹنگ کافیصلہ کیا اور20 اوورزمیں 7 وکٹوں کے نقصان پر122 رنزسکورکئے ۔تھوشارا نے 37بالزپر28 اور سورنگا نے 29 بالز کھیل کر 26 رنزکی اننگزکھیلی ۔پاکستان کی جانب سے بابرعلی نے 3اوورزمیں صرف 6 رنز کے عوض 2 اور نعمت اللہ نے 4اوورزمیں 27 رنز دے کر 2 کھلاڑی آؤٹ کئے ۔پاکستان بلائنڈ ٹیم نے مطلوبہ ہدف 6.2 اوورز میں ایک وکٹ کے نقصان پرمکمل کرلیا اوپنر نعمت اللہ نے بہترین بیٹنگ کا مظاہرہ کرتے ہوئے صرف 29 بالز میں 71 رنزناٹ أؤٹ گی باری کھیلی۔ 29 نومبر کو شیڈول میچ میں نیپال کو بھارت کے خلاف واک اوور مل گیا۔ورلڈ کپ میں 30 نومبر ہفتہ کو دو میچ کھیلے جائیں گے ۔ملتان کرکٹ سٹیڈیم میں صبح 11بجے پاکستان کامقابلہ افغانستان سے جبکہ جنوبی افریقہ اور بنگلہ دیش صبح 11بجے ڈی ایچ اے کرکٹ گراؤنڈ پر مدمقابل ہوں گے۔