اسلام آباد ( ڈیلی پاکستان آن لائن ) نائب وزیراعظم اور وزیر خارجہ اسحاق ڈار نے کہا ہے کہ ملکوں کے درمیان بین الملکی تعلقات کی بہتری کیلئے ثقافتی سفارت کاری اہم ہے۔
اسلام آباد میں پفوا چیریٹی بازار کی تقریب سے خطاب کرتے ہوئے اسحاق ڈار کا کہنا تھا کہ پفوا بازار جیسی تقریبات سال میں دو بار منعقد ہونی چاہئیں، پفوا بازار کیلئے سفارتکاروں کے بھرپور تعاون کا شکریہ ادا کرتے ہیں۔
انہوں نے کہا کہ ملکوں کے درمیان بین الملکی تعلقات کی بہتری کیلئے ثقافتی سفارتکاری اہم ہے، چیریٹی بازار کا انعقاد بھی سفارتکاری کا حصہ ہے، پفوا چیریٹی بازار کے انعقاد پر پفر منتظمین کو سراہتا ہوں، نمائش، ثقافتی شوز بھی پفوا چیریٹی بازار کا حصہ ہیں۔
وزیر خارجہ کا کہنا تھا کہ پفوا چیریٹی بازار کا انعقاد مختلف ثقافتوں کو قریب لانے کے حوالے سے اہم ہے۔
اسحاق ڈار نے مزید کہا کہ ہر ملک کی ثقافت ایک الگ پہچان رکھتی ہے، چیریٹی بازار لوگوں کو مختلف ثقافتوں کو دیکھنے کا موقع فراہم کرتا ہے، چیریٹی بازار کا مقصد پسے ہوئے طبقات کی فلاح میں حصہ ڈالنا ہے۔